ТҮНШЛЭГЧ ТАЛУУД ШИЙДЭЛ ХЭЛЭЛЦЭВ

Нээлттэй засгийн түншлэлийн Үндэсний зөвлөлийн Ажлын алба нь жил бүрийн 1 дүгээр сарын 31-ний өдөр тэмдэглэн өнгөрүүлдэг Иргэний нийгмийн өдрийг тохиолдуулан 2024 оны 01 дүгээр сарын 30-ны өдөр Нээлттэй засгийн түншлэлийн Дугуй ширээний цахим хэлэлцүүлэг зохион байгуулав. Тус хэлэлцүүлгийн үеэр:

• "Монгол Улсын Нээлттэй засгийн түншлэлийн 2023-2027 оны үйл ажиллагааны Үндэсний 5 дугаар төлөвлөгөө" (бичлэг энд дарж үзнэ үү);

• "Орон нутаг дахь нээлттэй засгийн түншлэл" санаачилга (бичлэг энд дарж үзнэ үү) сэдвээр Нээлттэй засгийн түншлэлийн Үндэсний зөвлөлийн Нарийн бичгийн дарга, Хүний эрхийг хангах Үндэсний хорооны Нарийн бичгийн дарга бөгөөд Ажлын албаны дарга Б.Болорсайхан танилцуулж,

• "Иргэний хөдөлгөөний иргэний орон зайд үзүүлэх нөлөө, иргэний орон зайн ач холбогдол" илтгэл (бичлэг энд дарж үзнэ үү)

  сэдвээр МОНФЕМНЕТ Үндэсний сүлжээний Гүйцэтгэх захирал (Ерөнхий зохицуулагч) Д.Энхжаргал илтгэлээ.

Нийт 25 төрийн бус байгууллагын төлөөлөл хэлэлцүүлэгт оролцож, илтгэлийн мөрөөр санал, сэтгэгдлээ хуваалцав. Төрийн бус байгууллага төрөл, хэлбэр үл хамааран нэг нэгнээ дэмжих, хамтрах, Иргэний нийгмийн байгууллага болон төрийн байгуулллагын хоорондын хамтын ажиллагааг илүү шинэ түвшинд гаргах, бүтээлч хамтын оролцооны ач холбогдолтойг онцлох, "Нээлттэй засгийн түншлэлийн орон нутаг" санаачилгыг аль болох олон талыг оролцуулан, төрийн бус байгууллагыг чадавхжуулах зорилгоор дэмжих, орон нутгийн засаг захиргаанд энэ талаарх мэдээлэл өгөх, түншлэх санаачилгаа одооноос эхлэх, цаашдын боломжит хамтын ажиллагаа, түүний хүрээгээ хэлэлцэн тохирох, төрийн бус байгууллагын талаарх татвар, нийгмийн даатгалын зохицуулалт, бодлогыг эргэн харах, дахин хэлэлцэх, цахим аюулгүй байдлыг хангах, төрийн бус байгууллагын ажилтнуудыг мэргэшүүлэх, тууштай, тогтвортой ажиллахад төрийн оролцоог багасгах, төрийн зүгээс гэрээлэн гүйцэтгэх ажлын жагсаалтаа гаргах, төрийн байгууллагын алба хаагч төрийн бус байгууллагын гардан хариуцах ажлыг булаахгүй, эсвэл шахахгүй байх, санхүүжүүлэгч байгууллагын бодлого, туршлагыг хянан-шинжлэх, төрийн бус байгууллагын үйл ажиллагааг ай савд төрөлжүүлэн ангилах, сэдэв, туршлага үл хамааран дундын хөрсөө бүрдүүлэх болон хамтын ашиг сонирхлоо хамгаалахын тулд нэгдэх шаардлагатай байгааг онцлов.