"КИНО УРЛАГААР ДАМЖУУЛАН ХҮНИЙ ЭРХИЙГ ТУНХАГЛАХ НЬ” ФОРУМЫН УРИАЛГА

Хүний эрхийг хангах Үндэсний хороотой хамтран зохион байгуулсан "Хархорум" олон улсын кино наадмын үеэрх 2023 оны 12 дугаар сарын 10-ны өдрийн "Кино урлагаар дамжуулж хүний эрхийг тунхаглах нь" форумын 136 оролцогчийн хэлэлцэн түгээж байгаа уриалгыг хүргэж байна. Татаж авахыг хүсвэл энд дарна уу.

УРИАЛГА

“Хархорум” олон улсын кино наадам 2023 онд анх удаа зохион байгуулагдаж, Хүний эрхийн түгээмэл тунхаглал батлагдсаны 75 жилийн ойд зориулан хүний эрхийн сэдвээр туурвисан кино бүтээлүүдийг үзэгчдэд толилууллаа.

Олон улсын наадмын хүрээнд зохион байгуулагдсан “Кино урлагаар дамжуулан хүний эрхийг тунхаглах нь” форумд оролцогч бид киноны уран бүтээлчиддээ хандан дараах уриалгыг гаргаж байна.

Иргэнээ дээдэлдэг ардчилсан нийгэмд хүний эрх, эрх чөлөөг хангах нь улс төр, нийгэм, олон нийтийн анхаарлын төвд байх нь зүй ёс бөгөөд хүний аливаа эрхийн зөрчил нь шударга ёс, хууль дээдлэх ёсонд үл нийцнэ. Хүний эрхийн зөрчлийн асуудал уран бүтээлч бидний эмзэглэж явдаг сэдэв билээ. Кино уран бүтээлээрээ хүний эрхийн зөрчлүүд, ялангуяа хүний эрхийн нэн ноцтой зөрчил болох авлига, хээл хахуулын асуудлыг хөндөн уран сайхны аргаар илэрхийлэх нь бидний нийгмийн өмнө хүлээх хариуцлага, үүрэгтэй шууд холбоотой. Иймд уран бүтээлдээ хүний эрхийн асуудлыг хөндөхдөө дараах зүйлийг чухалчлан анхаарахыг уриалж байна.

Нэгдүгээрт, хүний эрхийн мэдрэмжээ сайжруулж, мэдлэг боловсролоо дээшлүүлэх. Үүний тулд уран бүтээлээ туурвихдаа дор дурдсан хэм хэмжээг сахих.

• Аливаа хэлбэрийн алагчлал, нас хүйс, үндэс угсаа, гарал үүслээр ялгаварлан гадуурхах, дээрэлхэн тохуурхах, үндэсний болон бэлгийн цөөнх, нийгмийн бусад бүлгийн эсрэг үзэн ядах үзлийг өөгшүүлэх, дэвэргэх, хэт үндсэрхэх үзлийг хөөрөгдөн турхирахыг үл тэвчих.

• Хүний эрхийн асуудлыг хөндөхдөө туйлшрал, төөрөгдлөөс сэргийлж, хүний эрхийн зөрчилд тулгуурласан гол явдлынхаа драмын зөрчлийг тайлах, үр дүн, үр дагаварыг шийдвэрлэхдээ ёс зүйн ухаалаг сонголт хийж, ёс суртахууны хэм хэмжээнд нийцсэн байхад анхаарах.

Хоёрдугаарт, хууль эрх зүйн мэдлэгээ дээшлүүлэх, уран бүтээлдээ хууль, эрх зүйн зөвлөгөө авч хэвших ба кино урлагаар дагнан мэргэшсэн хуульч бэлтгэхэд анхаарах,

Гуравдугаарт, өөрсдийн туурвисан уран сайхны болон баримтат киногоо ашиглан үзэгчдийнхээ хүний эрхийн мэдлэг боловрол, урлагийн боловсролыг дээшлүүлэх, хүний эрхийг хамгаалах нөлөөллийн ажилд оролцох, иргэний нийгмийн байгууллагуудтай хамтран ажиллах,

Дөрөвдүгээрт, уран бүтээлчдийн эрхийг хамгаалах, ялангуяа хөдөлмөрлөх эрх, зохиогчийн эрхийг хүндэтгэх, хамгаалах, ажлын байрандаа хүний эрхийн зөрчлөөс урьдчилан сэргийлэхэд байнга анхаарал тавих,

Тавдугаарт, урлагийн чиглэлийн их сургуулиудын хөтөлбөрт хүний эрхийн хичээл оруулах шаардлагатай болохыг ойлгох, уриалан дуудах.

Улаанбаатар хот

2023.12.10