"Ази, Номхон далайн бүсийн сүлжээний Харилцан суралцах туршлага" хуралд оролцов

"Ази, Номхон далайн бүсийн сүлжээний Харилцан суралцах туршлага" хурал "Улс төрийн эрх мэдэл шилжиж, иргэний орон зай хумигдаж байгаа цаг үед Ази, Номхон далайн бүсэд Нээлттэй засгийн үнэт зүйлсийг бэхжүүлэх нь" сэдвийн дор Бүгд Найрамдах Индонез Улсын Баруун Жава мужийн Бандунг хотноо 2024 оны 6 дугаар сарын 26-28 -ны өдөр боллоо. Хурлаар Ази, Номхон далайн бүсийн Нээлттэй засгийн түншлэлийн гишүүдийн дунд ялангуяа авлигатай тэмцэх, дижитал инновац, иргэний оролцооны чиглэлээр нээлттэй засгийн үнэт зүйлсийг түгээн дэлгэрүүлэх, хэрэгжүүлэх шилдэг туршлагыг солилцох; Нээлттэй засгийн түншлэлийн амлалтуудыг институцижүүлэх, хэрэгжүүлэхэд гишүүн орнуудад тулгарч байгаа тодорхой сорилт, хүлээлт, бүс нутагт, ялангуяа шинэ гишүүн орнуудын хувьд хамааралтай хүлээлтийг хэлэлцэх; удахгүй болох Ази Номхон далайн бүсийн уулзалтад оруулах санал зөвлөмжийг тодорхойлох зорилгоор Монгол, Индонез, Филиппин, Папуа Шинэ Гвиней зэрэг улсын төр, иргэний нийгмийн төлөөлөл оролцов. Монгол Улсын Нээлттэй засгийн түншлэлийн Үндэсний Зөвлөлийн нарийн бичгийн дарга Б.Болорсайхан "Иргэний орон зайг тэлэх, НЗТ-ийн зарчмуудыг уялдуулахтай холбогдуулан хүний ​​эрхийг хамгаалах үндэсний болон бусад тогтолцоонд хүний эрхийн бие даасан үндэсний байгууллагын гүйцэтгэх үүрэг" сэдвээр илтгэж, манай улсын хүний эрхийг хамгаалах үндэсний тогтолцоо, түүнд шинэ тутам механизм - Хүний эрхийг хангах Үндэсний хороо, Орон нутаг дахь хүний эрхийн төлөв байдлыг тайлагнах, илтгэх журам зэрэг санаачилга, түүний оруулж байгаа хувь нэмэр, Хүний эрхийн Үндэсний Комиссыг хэрхэн дэмжиж, хамтран ажиллаж байгааг цохон тэмдэглэлээ.