МАСАМ II төслийн хүрээнд Сэлэнгэ аймгийн удирдлагууд болон төрийн бус байгууллагын төлөөллүүдтэй хамтын ажиллагаа эхлүүлэв

Дэлхийн Банкнаас хэрэгжүүлж буй “Монгол Улсад ил тод байдал, олон нийтийн оролцоог нэмэгдүүлэхэд нийгмийн эгэх хариуцлагыг бэхжүүлэх нь” төслийн хүрээнд Глоб Интернэшнл төв /ГИТ/ ТББ-ын МАСАМ II төслийн баг 2021 оны 12 сард төслийн   зорилтот аймаг болох Сэлэнгэ аймагт ажиллалаа. 

Уулзалтын үеэр тус аймгийн төрийн болон иргэний нийгмийн байгууллагын төлөөллүүдтэй уулзалт хийж, МАСАМ II төслийн албан ёсны танилцуулга болон төслийн талаарх санал бодлоо солилцов.

Уулзалтын үеэр төрийн болон иргэний нийгмийн байгууллагуудын төлөөллүүд бүтээлч, үр дүнтэй хамтын ажиллагаа чухал гэдэгтэй санал нийлж байв. Тухайлбал, Сэлэнгэ аймгийн Нийгмийн бодлогын хэлтсийн дарга Б.Энхбат “Нийгэмд үйлчилдэг ТББ-уудтай хамтраад, ажлын хэсэг байгуулах замаар орон нутагтаа тулгамдсан асуудлуудыг шийдэх гарц хайж болох” тухай хэлэв. Мөн Сэлэнгэ аймгийн Эрүүл мэндийн газрын Удирдлага, төлөвлөлтийн хэлтсийн дарга н.Бадмаа анхан шатны тусламж үйлчилгээг орон нутагт сайжруулах асуудлыг хөндөн, энэхүү төсөл хэрэгжиж байгаад талархлаа илэрхийлээд, хамтран ажиллахаа илэрхийллээ. Сэлэнгэ аймгийн Хөрөнгө оруулалт, хөгжлийн бодлого төлөвлөлтийн хэлтсийн ахлах мэргэжилтэн Я.Мөрөн “Төр болон иргэний нийгмийн байгууллагуудын дунд мэдээлэл, ойлголтын зөрүү их байдгийг” онцлоод, цаашид үүнийг шийдэх тал дээр “иргэдэд төлөвлөлтийн шатнаас эхлээд ойлгомжтой хэлбэрээр мэдээллийг хүргэдэг, танилцуулга хийхэд анхаарна” гэв.