Төсвийн үйл явцад нийгмийн эгэх хариуцлагын ойлголт, арга хэрэгслийг ашиглах тухай сургалт болов

Хүүхдийг Ивээх Сангаас “Төсвийн үйл явцад нийгмийн эгэх хариуцлагын ойлголт, арга хэрэгслийг ашиглах нь” сургалтыг Өмнөговь, Дундговь, Дорноговь аймагт  12 дугаар сарын  7-14-ний өдөр амжилттай зохион байгуулав. Сургалтад аймгуудын төрийн байгууллагууд, эрүүл мэндийн салбарын ажилтнууд, иргэний нийгмийн байгууллагууд, иргэдийн төлөөлөл бүхий нийт 60 хүн оролцлоо.
“Монгол Улсад ил тод байдал, олон нийтийн оролцоог нэмэгдүүлэхэд нийгмийн эгэх хариуцлагыг бэхжүүлэх нь буюу  MAСAM-2” төслийн үйл ажиллагааны хүрээнд энэхүү сургалтыг зохион байгуулж байгаа юм. Уг  төсөл  Швейцарын хөгжлийн агентлаг, Дэлхийн банк, Нийгмийн эгэх хариуцлагын дэлхийн түншлэл байгууллагуудын санхүүжилтээр хэрэгжиж байна.

МАСАМ-2 төсөл нь Монгол Улсад нийгмийн эгэх хариуцлагыг бэхжүүлэх замаар эрүүл мэндийн анхан шатны тусламж үйлчилгээний чанарыг сайжруулах, эрүүл мэндийн салбарын төсвийг  зохистой, үр ашигтай төлөвлөх, төсөвлөх, зарцуулахад иргэд, ИНБ-ын үр дүнтэй оролцоог дэмжиж байгаа юм. Ингэснээр төр, ИНБ, иргэд харилцан ярилцаж, ойлголцолд хүрэх, хамтын шийд гаргах замаар эрүүл мэндийн анхан шатны тусламж  үйлчилгээний чанар хүртээмжийг сайжруулах боломжийг хамтдаа эрэлхийлэх, олох, гүйцэтгэх боломж бүрдэнэ.   
Төсөлд оролцогч талуудыг чадавхжуулах “Төсвийн үйл явцад нийгмийн эгэх хариуцлагын ойлголт, арга хэрэгслийг ашиглах нь” сургалтаар нийгмийн эгэх хариуцлага, иргэдийн оролцоо, ил тод байдал, төрийн санхүүгийн удирдлага, улсын төсөв, төсвийн харилцаа, улсын төсвийн хөрөнгө оруулалт, түүнд иргэд оролцох нь зэрэг олон талын мэдлэг олголоо. Мөн эрүүл мэндийн анхан шатны тусламж үйлчилгээний талаарх үндсэн ойлголтыг, тус үйлчилгээний төсөв дэх иргэдийн оролцоо, эрүүл мэндийн үйлчилгээний чанар хүртээмжийн оролцоот хяналт сэдвүүдээр мэдлэг олгож, Монгол Улс болон олон улсад хэрэгжсэн  нийгмийн эгэх хариуцлагын төслийн сайн жишээнээс танилцуулж, оролцогчдыг чадавхжуулав.