Архангай аймгийн ИНБ-уудыг чадавхжуулах ахисан түвшний сургалт боллоо

Глоб Интернэшнл Төв “Монгол Улсад ил тод байдал, олон нийтийн оролцоог нэмэгдүүлэхэд нийгмийн эгэх хариуцлагыг бэхжүүлэх нь” буюу МАСАМ II төслийн хүрээнд Архангай аймгийн “Тэгш тусгал” ТББ-тай хамтран, “ИНБ-ын оролцоо ба мониторинг” сэдэвт сургалтыг 3 дугаар сарын 17, 18-ны өдрүүдэд тус аймгийн төв Цэцэрлэг сумд зохион байгуулж байна. Энэхүү сургалт нь ГИТ-ийн МАСАМ II төслийн багийн зорилтот орон нутгуудад хийж буй 13 дахь сургалт бөгөөд энэ удаад ахисан түвшинд сургалтыг зохиож байгуулж байна.

Тус хоёр өдрийн сургалтад Архангай аймагт үйл ажиллагаагаа явуулдаг ИНБ-ын төлөөлөл, тухайлбал, Архангай аймгийн хөгжлийн бэрхшээлтэй иргэдийн холбоодын зөвлөл, Олны санаачлага Архангайн Зөвлөл,  Монголын эмэгтэйчүүдийн холбооны Архангай аймаг дахь салбар зөвлөл, “Болор сэтгэл”, “Мэдлэгийн сүлжээ” болон “Таны төлөө бид” ТББ-ын төлөөлөл нийт 25 хүн оролцож байна. Сургалтын үр дүнд Архангай аймгийн ИНБ-уудын төлөөллүүд төсвийн үйл явцад нийгмийн эгэх хариуцлагын арга хэрэгслийг оновчтой хэрэгжүүлэхэд шаардлагатай мэдлэг, ур чадвараа нэмэгдүүлснээр мониторинг хийх чадвартай болох юм. 

“Тэгш тусгал” ТББ нь Финланд улсын Гадаад хэргийн яам болон ФЛОМ байгууллагын санхүүжилтээр “Иргэний нийгмийн байгууллагыг бэхжүүлснээр орон нутгийн иргэдийн оролцоог идэвхжүүлэх нь” төслийг хэрэгжүүлж байгаа нь ГИТ-ийн хэрэгжүүлж буй МАСАМ II төсөлтэй нягт уялдаж байгаа юм.